FIFA fillon hetimet ndaj Serbisë për flamurin në dhomën e zhveshjes që kishte hartën e Kosovës





FIFA ka hapur procedura kundër Federatës së Futbollit të Serbisë pasi një flamur që tregonte Kosovën si pjesë të vendit të tyre dyshohet se ishte varur në dhomën e zhveshjes kur ata u përballën me Brazilin në Kupën e Botës.

Imazhi i flamurit me mesazhin “nuk dorëzohemi” në serbisht u bë virale në rrjetet sociale kur u shpërnda nga Hajrulla Çeku, ministri i Kulturës, Rinisë dhe Sportit të Kosovës.

“Imazhe të turpshme nga dhoma e zhveshjes së Serbisë, duke shfaqur mesazhe urrejtjeje, ksenofobike dhe gjenocidale ndaj Kosovës, duke shfrytëzuar platformën e Kupës së Botës”.
“Ne presim veprime konkrete nga FIFA duke pasur parasysh se Federata e Futbollit të Kosovës (FFK) është anëtare e plotë e FIFA-s dhe UEFA-s”, ka shkruar Çeku në Tëitter.

Kosova u bë anëtare e UEFA-s dhe FIFA-s në vitin 2016, tetë vjet pasi vendi shpalli pavarësinë nga Serbia, shkruan Reuters.

Tashmë Komiteti Disiplinor i FIFA-s ka hapur procedurë kundër Federatës së Futbollit të Serbisë.

“Komiteti Disiplinor i FIFA-s ka hapur procedurat kundër Federatës së Futbollit të Serbisë për shkak të një flamuri të shfaqur në dhomën e tyre të zhveshjes me rastin e ndeshjes Brazil – Serbi”, thuhet në një deklaratë.
Procedurat u hapën në bazë të nenit 11 të Kodit Disiplinor të FIFA-s dhe nenit 4 të Rregullores për Kupën e Botës FIFA 2022.

Edhe FFK e ka dënuar ashpër “aksionin agresiv” kundër vendit tonë.