Njeriu më i pasur në botë humbi mbi 10 miliardë euro në një ditë?

Njeriu më i pasur në botë, pronari i prodhuesit francez të mallrave luksoze LVMH Bernard Arnault, humbi 10.39 miliardë euro brenda një dite, shkruan media të mërkurën.

Arnault thuhet se e humbi atë shumë të martën pas një rënie të konsiderueshme të çmimeve të aksioneve.

Tregjet e aksioneve në SHBA janë në rënie dhe në veçanti sektori i mallrave të luksit po shënon humbje. Aksionet e kompanisë Louis Vuitton ranë me pesë për qind dhe kompanisë Kering, pronare e Gucci, me 2.97 për qind. Tregjet janë të shqetësuara për kërkesën e pasigurt për mallra luksoze në SHBA.

Bernard Arnault është ende njeriu më i pasur në botë, dhe pasuria e tij vlerësohet në 178.12 miliardë euro. Hendeku midis tij dhe njeriut të dytë më të pasur në botë, shefit të Tesla dhe Twitter, Elon Musk, është ngushtuar në 11.13 miliardë euro./Insajderi