Trendi i parave të falsifikuara po vazhdon të ‘lulëzojë’ në Kosovë, ku qindra e mijëra euro fals vihen përditë në treg. Rastet e tilla raportohen kryesisht nga zyrtarët e bankave në vend, teksa kartëmonedha e cila raportohet më së shumti si e falsifikuar janë ato prej 50 dhe 100 euro. Raste të tilla po raportohen me të madhe nga bankat e bizneset në Kosovë.
Një rast i tillë është zbuluar së fundi në Prishtinë, ku një zyrtare e bankës ‘Reiffeisen Bank’ në rrugën ‘Fahri Fazliu’ ka raportuar se kanë hasur në një kartëmonedhë prej 50 euro, që ishte deponuar nga një person dhe dyshohet se është e falsifikuar.
Sinjali mëson se posa është denoncuar rasti, njësia policore ka dalë në vendin e ngjarjes, me ç’rast kartëmonedha është konfiskuar.
Njëjtë ka ndodhur edhe me bankat tjera, sidomos me Raiffeisen dhe ProCredit dhe jo vetëm në kryeqytet, por edhe në qytete tjera.
Kujtojmë se kualiteti i parave false është shumë i lartë, saqë është e vështirë të detektohen pa aparatin përkatës.