Tani e tutje gratë shtatzëna CTG-në do të kenë mundësi ta bëjnë në Shtëpinë e Shëndetit në Bujanoc, pasi që Komuna e Bujanocit ka financuar pajisjen e këtij reparti me aparatë CTG.
Kështu ka njoftuar kryetari i Komunës së Bujanocit Arbër Pajaziti në faqen e tij në facebook “Shtëpia e Shëndetit në Bujanoc është pajisur me aparatin CTG, një pajisje moderne dhe shumë e rëndësishme për monitorimin e shëndetit të foshnjeve dhe nënës gjatë shtatzënisë”.
Postimi i plotë i Pajazitit:
“Komuna e Bujanocit e ka pajisur Repartin e Gjinekologjisë në Shtëpinë e Shëndetit Bujanoc me aparatin CTG
Shtëpia e Shëndetit në Bujanoc është pajisur me aparatin CTG, një pajisje moderne dhe shumë e rëndësishme për monitorimin e shëndetit të foshnjeve dhe nënës gjatë shtatzënisë.
Ky investim bën të mundur që gratë shtatzëna nga Bujanoci dhe rrethina të mos kenë më nevojë të udhëtojnë në Vranjë apo në klinika private për këtë shërbim, duke kursyer kohë, para dhe duke rritur sigurinë gjatë shtatzënisë.
Ky është një hap i rëndësishëm në drejtim të përmirësimit të shërbimeve shëndetësore publike në komunën tonë, dhe mbështetja e grave dhe familjeve të reja mbetet një nga prioritetet tona.
Ftojmë qytetaret tona të përfitojnë nga ky shërbim i ri, i cili tashmë ofrohet në mënyrë të rregullt dhe falas në Shtëpinë e Shëndetit në Bujanoc”.
