“Liria jonë i ka rrënjët te të rënët për liri. Vrasjet e fëmijëve në Kosovë janë krimet më të tmerrshme të Serbisë. Andaj e kemi obligim, për lirinë dhe paqen që e gëzojmë, për drejtësinë që e synojmë që kurrë mos t’i harrojmë. I përjetshëm qoftë kujtimi për të gjithë fëmijët e vrarë gjatë luftës në Kosovë”, ka deklaruar Kurti.
Kryeministri i Kosovës, Albin Kurti gjatë vizitës në ekspozitën “Bebëzat e mallit” ka thënë se vrasjet e fëmijëve në Kosovë janë krimet më të tmerrshme të Serbisë duke theksuar se Kosova e ka obligim që mos t’i harrojë kurrë këto vrasje.
Ai në këtë ekspozitë të fotografit, Korab Krasniqi dhe kuratores Vesa Sahatçiu dedikuar fëmijëve të vrarë, të zhdukur dhe të prekur nga lufta në Kosovë ka thënë se liria e Kosovës i ka rrënjët te të rënët për liri.
“Krahas së qenit një hapësirë e posaçme e përkujtimit, kjo ekspozitë e hapur sonte në Ministrinë e Drejtësisë, është edhe ftesë për reflektim rreth mënyrës se si e mendojmë dhe përfaqësojmë humbjen, individuale a kolektive”, ka thënë Kurti.
Për të nderuar dhe lartësuar kujtimin e fëmijëve të vrarë dhe të zhdukur gjatë luftës, Kurti ka thënë se Qeveria e Kosovës është e angazhuar në projektin për memorialin dedikuar atyre.
“Liria jonë i ka rrënjët te të rënët për liri. Vrasjet e fëmijëve në Kosovë janë krimet më të tmerrshme të Serbisë. Andaj e kemi obligim, për lirinë dhe paqen që e gëzojmë, për drejtësinë që e synojmë që kurrë mos t’i harrojmë. I përjetshëm qoftë kujtimi për të gjithë fëmijët e vrarë gjatë luftës në Kosovë”, ka vijuar ai.