Ministria e Informacionit dhe Telekomunikacionit njoftoi se Platforma Elektronike për transmetimin e informacionit urgjent tek qytetarët në rast të njoftimit të një fatkeqësie natyrore apo aksidenti tekniko-teknologjik që mund të kërcënojë jetën dhe shëndetin e njerëzve dhe pronës në zona të caktuara, sot u lançua zyrtarisht.
Krijimi i sistemit për transmetimin e informatave urgjente te qytetarët i ka paraprirë puna e përbashkët dhe përmbyllja e marrëveshjes për bashkëpunim ndërmjet Ministrisë së Informacionit dhe Telekomunikacionit dhe Ministrisë së Punëve të Brendshme, thuhet në njoftim.
Platforma elektronike do t’u mundësojë qytetarëve që të informohen urgjentisht për një ngjarje të rrezikshme duke dërguar një mesazh SMS në një territor të përcaktuar saktësisht, duke publikuar një njoftim për një ngjarje të rrezikshme nga ofruesit e shërbimeve mediatike dhe panelet tekstuale në autostradë.
Qëllimi i ministrive është që të gjithë qytetarët të informohen për rrezikun e afërt në mënyrën më të shpejtë të mundshme, duke ruajtur jetën dhe shëndetin e tyre.
Në periudhën në vijim, Ministria e Informacionit dhe Telekomunikacionit dhe Ministria e Punëve të Brendshme do të vazhdojnë punën intensive për përmirësime të mëtejshme të sistemit.
Përmirësimi i mëtejshëm i kësaj zgjidhjeje softuerike deri në fund të vitit 2025 do të mundësojë edhe njoftimin e qytetarëve përmes mesazhit CBS (Cell Broadcast System).
Me sistemet paralele të njoftimit (SMS dhe CBS), Serbia do t’i bashkohet grupit të vetëm disa vendeve në Evropë që kanë të dyja mënyrat për të paralajmëruar publikun, njoftoi ministria. /Danas/