Organizata The Future, në bashkëpunim me Zyrat për të rinj nga Bujanoci dhe Presheva, organizoi një diskutim publik të rëndësishëm me të rinjtë mbi të drejtat gjuhësore dhe përdorimin e gjuhës shqipe në shkrimin dhe jetën e përditshme. Ky aktivitet synonte të informonte dhe fuqizonte të rinjtë mbi të drejtat e tyre, me një fokus të veçantë në përdorimin e emrave në gjuhën shqipe.
Takimet u zhvilluan në Bujanoc dhe Preshevë, ku morën pjesë rreth 80 të rinj, të cilët patën mundësinë të shkëmbejnë ide, të mësojnë mbi të drejtat e tyre dhe të diskutojnë mbi sfidat e përditshme që lidhen me përdorimin e shqipes në institucione dhe dokumentacionin zyrtar.
Siç shihet nga fotografitë, diskutimet u mbajtën në një ambient të hapur dhe miqësor, duke krijuar një hapësirë të lirë për mendime dhe bashkëpunim. Të rinjtë treguan interes të madh për temën dhe u angazhuan në një debat të gjallë, duke ndarë përvoja dhe ide për forcimin e identitetit të tyre gjuhësor dhe kulturor.
Ky aktivitet është vetëm fillimi i një serie nismash që synojnë fuqizimin e brezave të rinj dhe avancimin e të drejtave të tyre gjuhësore.
The Future, me mbështetjen e projektit “Fuqizimi i të rinjve shqiptarë dhe përmirësimi i integrimit në shoqërinë serbe”, i zbatuar nga Iniciativat Qytetare @gradjanske dhe financuar nga @ukinserbia, po krijon mundësi për të rinjtë shqiptarë që të informohen dhe të angazhohen në përmirësimin e pozitës së tyre në shoqëri.
Këto takime janë një hap i rëndësishëm drejt ndërgjegjësimit dhe forcimit të komunitetit, duke promovuar bashkëpunimin dhe njohjen e të drejtave themelore gjuhësore!
