Rajon/Botë

Maqedonia abstenoi: Asambleja e Përgjithshme e OKB-së mbështeti rezolutën palestineze për përfundimin e luftës me Izraelin

September 19, 2024
Redaksia Spektri

Asambleja e Përgjithshme e OKB-së sot me shumicë mbështeti rezolutën jodetyruese palestineze që kërkon që Izraeli t’i japë fund “prezencës së paligjshme” në Gaza dhe Bregun Perëndimor të pushtuar, në afat prej një viti.

Për rezolutën votuan 124 nga 193 anëtarë të organizatës botërore, 14 ishin kundër, 43 abstenuan.

Në rezolutë gjithashtu bëhet thirrje për tërheqjen e të gjitha forcave izraelite dhe evakuimin e kolonëve hebrenj nga territoret e pushtuara palestineze “pa vonesë”.
Ambasadori i Izraelit në OKB, Dany Danon, e quajti rezolutën “përpjekje për të shkatërruar Izraelin përmes terrorizmit diplomatik”, duke shtuar se “kurrë nuk përmenden krimet e Hamasit dhe injorohet e vërteta, shtrembërohen faktet dhe zëvendësohet realiteti me trillim”.

Maqedonia e Veriut abstenoi nga votimi, së bashku me Britaninë e Madhe, Gjermaninë, Italinë, Holandën, Austrinë, Zvicrën, Suedinë, Danimarkën, Kroacinë, Bullgarinë, Rumaninë, Poloninë, Sllovakinë, Lituaninë, Ukrainën, Serbinë, Shqipërinë, Kanadanë, Indinë, Australinë dhe vende tjera.