Lugina

Rezoluta për Srebrenicën, Kamberi: Grusht i fortë për politikën e Vuçiqit

May 23, 2024
Redaksia Spektri

Pas miratimit të rezolutës së OKB-së për Srebenicën, ka reaguar deputeti i vetëm shqiptar në Parlamentin e Serbisë, Shaip Kamberi.

Kamberi ka thënë se ky është një grusht i fortë ndaj presidentit serb, Aleksandar Vuçiq, i cili mohon krimet e luftës dhe gjenocidin në Srebenicë.

“84 vende të botës i dhanë grusht të fortë narativit politik të presidentit serb të mohimit të krimeve të luftës dhe gjenocidit në Srebrenicë, politikës së glorifikimit të kriminelëve të dënuar”, ka thënë Kamberi.

Ai ka thënë se “bota do ta mbajë në mend Srebrenicën”.

Asambleja e Përgjithshme e OKB-së ka miratuar sot rezolutën, që shpall 11 korrikun Ditë Ndërkombëtare të Përkujtimit të Viktimave të Gjenocidit në Srebrenicë.

84 shtete votuan për, 19 ishin kundër e 68 abstenuan.

Vlen të theksohet se Hungaria është i vetmi vend në Bashkimin Evropian që ka votuar kundër rezolutës. /Telegrafi/Spektri/