Presidenti ukrainas Volodymyr Zelenskiy u kërkoi liderëve botërorë të mbledhur në Asamblenë e Përgjithshme të OKB-së të martën që të qëndrojnë unikë kundër pushtimit të Rusisë dhe tha se Moska zyrtare duhet të zmbrapset prapa në mënyrë që bota të mund të kthehet në zgjidhjen e sfidave të ngutshme globale.
Zelenskiy nxiti duartrokitje teksa zuri vendin e tij në foltoren e Asamblesë së Përgjithshme të Kombeve të Bashkuara në Nju Jork për paraqitjen e tij të parë personalisht në mbledhjen vjetore që kur Rusia pushtoi Ukrainën në shkurt të vitit 2022.
Sekretari i Përgjithshëm i OKB-së António Guterres tha se vende të tilla si Rusia po krijojnë një “botë pasigurie” për të gjithë pas pushtimit të Ukrainës, për të cilën ai thotë se “ka lëshuar fazën tjetër të jetës sonë: abuzim historik të të drejtave të njeriut, familje të copëtuara, fëmijë të traumatizuar, shpresat dhe ëndrrat u
shkatërruan.”
Presidenti amerikan, Joe Biden, ka thënë se mbledhja e OKB-së këtë javë është “errësuar nga hija e luftës”, të cilën ai e përshkroi si një “luftë të paligjshme pushtuese pa provokim nga Rusia” kundër Ukrainës.
“Asnjë komb nuk dëshiron që lufta të përfundojë më shumë se Ukraina”, tha ai, duke përsëritur mbështetjen e SHBA për Kievin dhe përpjekjet e tij për të sjellë “një zgjidhje diplomatike për një paqe të drejtë dhe të qëndrueshme”.
Fëmijët ukrainas që ishin dëbuar ilegalisht në Rusi kanë mbërritur në Bjellorusi.48 fëmijët vijnë nga rajonet e okupuara të Ukrainës, Donetsk, Luhansk dhe Zaporizhzhia, rajone këto të cilat Moska zyrtare pretendon se i ka aneksuar.
Zyrtarët në Bjellorusi i kanë mohuar më parë akuzat se ky vend ishte i përfshirë në largimin e paligjshëm të fëmijëve nga Ukraina, por të martën, Belta raportoi se largimi i fëmijëve nga Ukraina ishte organizuar nga një organizatë bamirëse bjelloruse – e mbështetur nga presidenti, Alexander Lukashenko.
Ukraina u bëri thirrje tri vendeve fqinje në Bashkimin Evropian të martën për ta nisur një “dialog konstruktiv” për t’i dhënë fund një mosmarrëveshjeje mbi tregtinë bujqësore dhe miratoi atë që e quajti një “skenar kompromisi”.
Polonia, Sllovakia dhe Hungaria njoftuan kufizime në importet nga Ukraina të premten, në një vendim për të cilin thanë se ishte marrë për t’i mbrojtur fermerët nga një rritje e importeve të drithërave dhe ushqimeve nga Ukraina që nga pushtimi i saj nga Rusia vitin e kaluar.
Sekretari amerikan i mbrojtjes, Lloyd Austin, në fjalën përmbyllëse pas një takimi me grupin e kontaktit të mbrojtjes së Ukrainës, ka thënë se “Mbrojtja ajrore do të vazhdojë të jetë nevoja më e madhe e Ukrainës për të mbrojtur qiejt, civilët dhe qytetet e saj, si dhe njerëzit e pafajshëm larg fushës së betejës.”
Britania do ta furnizojë Ukrainën me “dhjetëra mijëra” predha artilerie të tjera këtë vit, njoftoi të martën departamenti i mbrojtjes i qeverisë.
Një sulm raketor që goditi një treg të mbushur me njerëz në qytetin ukrainas të Kostiantynivka duke lënë vrarë të paktën 17 civilë në fillim të këtij muaji, mund të ishte shkaktuar nga një raketë e gabuar e lëshuar nga Ukraina, ka raportuar New York Times. 32 persona të tjerë u plagosën më 6 shtator nga goditja e raketës 20 km nga vijat e frontit në rajonin Donetsk të Ukrainës lindore.
Presidenti ukrainas, Volodymyr Zelenskiy, pak orë më vonë e akuzoi Rusinë për përgjegjësinë për sulmin.
Dy persona u vranë nga sulmet ruse në qytetet e Ukrainës gjatë natës, sipas autoriteteve lokale në Lviv dhe Kherson. Rusia goditi tri magazina industriale në një sulm me dron në qytetin perëndimor të Ukrainës, Lviv herët të martën, duke shkaktuar një zjarr të madh dhe duke vrarë të paktën një person.
Forcat ruse bombarduan gjithashtu qytetin jugor të Khersonit, duke vrarë një polic dhe duke plagosur dy civilë në një trolejbus, ka deklaruar kreu i administratës ushtarake të qytetit.
Forcat ajrore të Ukrainës thanë se Rusia kishte lëshuar gjithsej 30 dronë dhe një raketë balistike Iskander në sulmet ndaj Ukrainës gjatë natës, dhe se 27 prej tyre ishin rrëzuar.
Ukraina zyrtare i ka thënë gjykatës më të lartë të OKB-së në Hagë të martën se Rusia e justifikoi luftën kundër Ukrainës duke u thirrur “në një gënjeshtër të tmerrshme”, domethënë se pushtimi i Moskës ishte për të ndaluar një gjenocid të supozuar.
“Komuniteti ndërkombëtar e miratoi Konventën e Gjenocidit për mbrojtje; Rusia thirret në Konventën e Gjenocidit për të shkatërruar”, u tha gjyqtarëve përfaqësuesi i Ukrainës Anton Korynevych./The Guardian