Përplasjet politike rreth funksionimit të Këshilli Kombëtar Shqiptar janë rikthyer në fokus pas deklaratave publike të kryetarit të Komunës së Bujanocit, Arbër Pajaziti, ndaj të cilave ka reaguar kryetari i KKSH-së, Enkel Rexhepi, shkruan Spektri.
Pajaziti kritikoi punën e KKSH-së gjatë mandatit të fundit, duke pretenduar se institucioni ka humbur projekte dhe se energjia është harxhuar në “përplasje politike”, ndërsa ngriti edhe çështjen e numrit të përfaqësuesve të ardhshëm të Këshillit Kombëtar.
Por ndaj këtyre deklaratave reagoi ashpër Enkel Rexhepi, i cili rikujtoi se shqiptarët e Luginës së Preshevës nuk morën pjesë në regjistrimin e vitit 2011 si akt politik kundër diskriminimit sistematik, pasivizimit të adresave dhe shpërnguljes së shqiptarëve nga Lugina.
Aktualisht, sipas ligjeve në fuqi, Këshilli Kombëtar Shqiptar ka vetëm 15 këshilltarë, pikërisht për shkak se shteti serb vazhdon ta llogarisë përbërjen e Këshillit mbi bazën e regjistrimit të bojkotuar të vitit 2011. Megjithëse shqiptarët morën pjesë në regjistrimin e vitit 2022 dhe numri i tyre garanton 29 përfaqësues në KKSH, institucionet shtetërore ende nuk e kanë reflektuar këtë në përbërjen e re të Këshillit.
Rexhepi theksoi se 29 përfaqësuesit nuk janë “meritë” e askujt politikisht, por rezultat i shqiptarëve që kanë mbetur dhe kanë rezistuar në Luginën e Preshevës, pavarësisht diskriminimit sistematik.
Në reagimin e tij, ai akuzoi Pajazitin dhe pushtetin lokal në Bujanoc për mungesë mbështetjeje konkrete ndaj KKSH-së, duke rikujtuar se Komuna e Bujanocit nuk ka ndarë mjete financiare për institucionin kombëtar të shqiptarëve.
“Patriotizmi nuk bëhet vetëm me deklarata për Facebook e konferenca shtypi. Matet edhe me vendime konkrete”, shkroi Rexhepi.
Ai mbrojti gjithashtu angazhimin politik të KKSH-së, duke theksuar se çështja e shqiptarëve të Luginës së Preshevës është ngritur në institucione ndërkombëtare, përfshirë Bundestagun gjerman dhe Kongresin amerikan.
Debati mes dy zyrtarëve shqiptarë vjen në prag të diskutimeve për zgjedhjet dhe përbërjen e ardhshme të Këshilli Kombëtar Shqiptar, ndërsa në opinion po shtohen kërkesat që institucionet shtetërore të njohin rezultatet e regjistrimit të vitit 2022 dhe t’i rikthejnë shqiptarëve përfaqësimin që u takon me ligj.