Bahamas ka njohur zyrtarisht Republikën e Kosovës si shtet të pavarur dhe sovran, duke u bërë vendi i 121-të që e njeh shtetin e Kosovës. Vendimi është cilësuar si historik për vendin dhe përpjekjet e vazhdueshme diplomatike të tij.
Marrëveshja për njohje dhe vendosje të marrëdhënieve diplomatike është nënshkruar në kryeqytetin e Bahamas, në prani të përfaqësuesve të të dyja shteteve, përfshirë Kryeministrin e Bahamas, Philip Davis. Me këtë akt, Kosova dhe Bahamas zyrtarizojnë hapjen e një kapitulli të ri bashkëpunimi dypalësh.
Në Deklaratën e përbashkët thuhet se marrëdhëniet diplomatike vendosen në përputhje me të drejtën ndërkombëtare dhe Konventën e Vjenës për Marrëdhëniet Diplomatike të vitit 1961. Të dyja palët riafirmojnë përkushtimin ndaj parimeve të Kartës së Kombeve të Bashkuara, duke theksuar respektimin e sovranitetit, barazisë së shteteve dhe zgjidhjen paqësore të mosmarrëveshjeve.