Në rajonin e Gjilanit kanë nisur intervistimet lidhur me dyshimet për manipulime gjatë numërimit të votave në zgjedhjet e parakohshme parlamentare të mbajtura më 28.12.2025.
Kështu ka konfirmuar kryeprokruroi i Prokurorisë Themelore në Gjilan, Arben Kadriu.
“Kanë filluar intervistat lidhur me manipulimet e rezultateve zgjedhore në Regjionin e Gjilanit. Jemi ende në fillim të procesit”- ka thënë Kadriu për KALLXO.com.
Të dielën, më 01.02.2026, 43 kryesues ishin intervistuar në stacionet policore në Mitrovicë të Jugut dhe Mitrovicë të Veriut.
Ndërsa të hënën, më 02.02.2026 Prokuroria Themelore e Prishtinës ka autorizuar Policinë për grumbullimin dhe mbledhjen e provave lidhur me dyshimet për manipulim me vota në komunën e Podujevës.
Mëngjesin e 28 janarit, po ashtu kishte nisur aksioni i gjerë i Prokurorisë së Gjakovës rreth dyshimeve për falsifikim të rezultatit zgjedhor në Malishevë.
Në anën tjetër, Prokuroria Themelore në Prishtinë, përkatësisht Departamenti i Krimeve të Rënda, ka lëshuar autorizim për Policinë e Kosovës me qëllim të grumbullimit të informatave dhe evidentimit të shkeljeve të mundshme nga personat përgjegjës në procesin e numërimit të votave edhe në Drenas.
Prokuroria ka bërë të ditur se duke përcjellë në vazhdimësi procesin e rinumërimit të votave për zgjedhjet e përgjithshme të mbajtura me datë 28.12.2025, ka vërejtur mospërputhje lidhur me rezultatet e kandidatëve për deputet pas përfundimit të procesit të rinumërimit në Komunën e Drenasit.
Krejt në fillim, po për shkak të manipulimit me vota në Prizren, janë lëshuar 109 vendime për ndalime 48 orëshe nga Prokuroria Themelore e Prizrenit. Ndaj 23 prej tyre është caktuar masa e paraburgimit prej një muaji.
Vendimi për rinumërim, fillimisht KQZ e mori pasi janë shikuar videot nga kamerat në Qendrat Komunale të Numërimit, të cilat kanë ngritur dyshime se votat e kandidatëve për deputetë nuk janë shënuar në mënyrë të saktë në platformën zyrtare të KQZ-së.
Komisioni Qendror i Zgjedhjeve në mbledhjen e mbajtur më 19.01.2026, pati vendosur për rinumërimin e të gjitha vendvotimeve në 28 komuna.
Rinumërimi i plotë i votave nga KQZ ka përfunduar dhe ky institucion më 31.01.2026 ka shpallur rezultatet përfundimtare të zgjedhjeve të parakohshme të 28.12.2025.
Anëtarët e KQZ-së i kanë miratuar listat e kandidatëve të të gjitha partive, përveç asaj të Listës Serbe, partisë më të madhe të serbëve në Kosovë. Tre anëtarë kanë votuar për, dy kundër (nga Lëvizja Vetëvendosje), dhe anëtarët e tjerë kanë abstenuar.
Rinumërimi është kryer pas dyshimeve për manipulime me votat e kandidatëve për deputetë.
Përgjatë procesit, votat për disa kandidatë ndryshuan – me raste deri në 6 mijë për një individ – ndërsa ato për partitë nuk u cenuan.