Duke folur për sanksionet amerikane, ai theksoi se zhvillimi ekonomik dhe stabiliteti lidhen drejtpërdrejt me heqjen e tyre. “Për këto çështje po bisedojmë prej muajsh dhe kemi arritur rezultate të mira, por presim vendimin përfundimtar”, tha ai.
Kur u pyet për fatin e gazetarit amerikan Austin Tice, i cili është zhdukur në Siri, Sharaa tha se “gjatë luftës që regjimi i mëparshëm zhvilloi kundër popullit të vetë u zhdukën qindra mijëra njerëz, përfshirë të huajt”.
“Formuam një komision për personat e zhdukur dhe u fokusuam tek rastet e atyre që kanë shtetësi amerikane. Koordinojmë me autoritetet amerikane dhe kam biseduar me nënën e Austinit, një grua e mrekullueshme. Nëna ime e takoi atë sepse edhe ajo ka kaluar dhimbje të ngjashme; unë kam qenë i zhdukur për shtatë vjet dhe të gjithë mendonin se isha i vdekur, përveç saj”, tha presidenti sirian.
Duke iu përgjigjur pyetjes për të kaluarën ushtarake, Sharaa tha se “lufta nuk është turp nëse ka një qëllim fisnik”.
“Kam mbrojtur popullin tim nga padrejtësia. Kam bërë beteja të shumta, por kurrë nuk kam vrarë të pafajshmit. Politikat perëndimore kanë shkaktuar shumë luftëra të kota në rajonin tonë, dhe sot shumë amerikanë nuk e kuptojnë pasojën e tyre,” shtoi ai.
Përsa i përket marrëdhënieve me Izraelin, Sharaa zbuloi se bisedimet janë në progres dhe se “kanë shkuar larg”. Ai shtoi se “në bisedimet e drejtpërdrejta me Izraelin kemi shkuar larg, por marrëveshja përfundimtare kërkon që Izraeli të tërhiqet në kufijtë e mëparshëm deri më 8 dhjetor. Shtetet e Bashkuara janë me ne në ato bisedime dhe presidenti Donald Trump mbështet qëndrimin tonë dhe dëshiron të përshpejtojë arritjen e zgjidhjes”.
Ai paralajmëroi se Izraeli nuk mund të justifikojë pafundësisht zgjerimin e “zonave të sigurisë”.
“Zaptuan Lartësitë e Golanit për t’u ‘mbrojtur’, tani vendosin kushte për Jugun e Sirisë që ‘të mbrojnë Golanin’. Nëse vazhdojnë kështu, një ditë, figurativisht, do të arrijnë deri në Mynih”, deklaroi ai.