Ende nuk dihet se kush është duke dërguar dokumente në zyret qendrore të Organizatës së Veteranëve të Luftës së UÇK-së, për të cilat po pretendohet se janë konfidenciale dhe të Dhomave Specializuara ne Hagë.

Identiteti i personit i cili më 7 dhe 16 shtator ka dërguar në këtë organizatë “me mijëra dosje me dëshmi dhe emra dëshmitarësh”, vazhdon të jetë anonim.

Institucionet e rendit dhe ligjit në Kosovë nuk konfirmojnë hetime për këtë rast. Policia e Kosovës tha se pyetja për këtë çështje duhet të adresohet ‘tek institucionet përkatëse’, e në Prokurorinë e Shtetit nuk përgjigjën. Koment për këtë çështje nuk dha as Prokuroria e Specializuar në Hagë.

Në një konferencë për media të enjten në Prishtinë, Organizata e Veteranëve të Luftës së UÇK-së konfirmoi se në prani të avokatit Tomë Gashi, u ka dorëzuar hetuesve të Gjykatës Speciale ‘dosjet që kanë mbetur’ në zyret e kësaj organizate.

Avokati i OVL UÇK-së, Tomë Gashi, tha për Radion Evropa e Lirë, se institucionet e vendit nuk kanë arsye të hetojnë sjelljen e këtyre dosjeve, pasi ‘rrjedhja e tyre ka ndodhur në Hagë’. Ai tha se në cilësinë e avokatit, ka përfaqësuar organizatën në dorëzimin e dosjeve.

“Ata me dokumentacion, identifikim të Gjykatës Speciale, i kanë marrë një pjesë të dokumenteve që kanë mbetur, për shkak se ditën e djeshme kur janë sjell këto dokumente, një pjesë e tyre ka mbetur aty dhe ka mundur të përdoret nga kushdo gjatë konferencës për media”, tha Gashi.

Përgjegjësi penale për ata që publikojnë dosjet
Të mërkurën, drejtues të OVL UÇK-së kishin thënë se nuk do të dorëzojnë dokumentet te hetuesit e Hagës pa praninë e Policisë dhe Prokurorisë së Kosovës. Por, ata ndryshuan qëndrim pas këshillës së avokatit, duke u bazuar në faktin se Ligji për Dhomat e Specializuara dhe Zyrës së Prokurorit të Specializuar e përcakton si vepër penale, publikimin apo posedimin e dokumenteve të Gjykatës. Dënimi në këto raste është deri në dhjetë vjet burg.

Njëri nga gazetarët në Prishtinë, Zekirja Shabani, tregon se ka marrë një kopje nga dosjet e para të prezantuara në konferencën e OVL UÇK më 7 shtator, dhe më pas ka publikuar disa pjesë që në gjykimin e tij kanë qenë të publikueshme. Porse, më pas, media ku ai punon, është kontaktuar nga Dhomat e Specializuara dhe më pas ai është pajtuar që dosja të dorëzohet në tërësi, e cila, sipas Shabanit, kishte materiale të ndjeshme të Task Forcës Hetuese të udhëhequr nga Clint Williamson në vitet 2014-2015.

“Duke e ditur sensitivitetin e këtyre dokumenteve, vazhdojmë të besojmë që nuk është mirë që ato t’i ketë në dorë asnjë person. Ne kemi pranuar t’i dorëzojmë me procedurë standarde, ku hetuesit na kanë dëshmuar se janë nga Gjykata Speciale”, tha Shabani për Radion Evropa e Lirë.

Juristja e së drejtës së mediave, Flutura Kusari, fton gazetarët që t’i përmbahen etikës dhe të mos publikojnë dokumente që mund të rrezikojnë jetën e personave që janë të përfshirë në proceset gjyqësore.

“Këto dokumente kanë rënë në më shumë se një dorë, por fakti që nuk janë publikuar dëshmon se të gjithë e dinë përgjegjësinë penale që pason, nëse dokumente të tilla do të publikoheshin. Ajo që është me rëndësi është që këto procedura të Gjykatës të respektohen, nëse për asgjë tjetër, për shkak të drejtave që i gëzojnë personat e hetuar, personat e akuzuar dhe po ashtu që të mbrohen dëshmitarët të cilët janë pjesë e këtyre proceseve”, tha Kusari për Radion Evropa e Lirë.

Mbrojtja e dëshmitarëve, sfiduese për Specialen
Njohës të fushës së drejtësisë, ditë më parë për REL kanë shprehur shqetësimin e tyre se rasti me këto dosje, mund të frikësojnë dëshmitarët potencialë në proceset gjyqësore ndaj ish-pjesëtarëve të Ushtrisë Çlirimtare të Kosovës.

Avokati Tomë Gashi beson se interesi i këtyre veprimeve është që të diskreditohet puna e Gjykatës Speciale. Sipas tij, dokumentet janë sjellë tek OVL UÇK me besimin se kjo organizatë do t’i publikojë ato.

Ndërkohë, mediat në Kosovë raportuan edhe për dorëheqjen e prokurorit Kwai Hong Ip pas ‘rrjedhjes së dosjeve’, por zëdhënësi i Zyrës së Prokurorit të Specializuar, Christopher Bennet, i tha Radios Evropa e Lirë se prokurori Hong Ip ishte dorëhequr më herët dhe se tani punon në një institucion tjetër.

Bashkimi Evropian sot do të nënshkruajë kontratën në orën 17:00 për të dërguar 5 milionë euro ndihmë Kosovës, ka njoftuar Ministria e Shëndetësisë.

Kjo shumë do të shfrytëzohet për pajisje mjeksore për të luftuar coronavirusin.

Postimi i plotë në facebook nga Ministria:

“Nataliya Apostolova, Shefja e Zyrës së BE-së në Kosovë/Përfaqësuese e Posaçme e BE-së, do të nënshkruajë sot një kontratë me vlerë 5 milionë euro për nevoja të menjëhershme të Kosovës për luftimin e pandemisë COVID-19. Ceremonia e sotshme e nënshkrimit do të transmetohet drejtpërdrejt në orën 17:00 në Facebook përmes faqes së BE-së në Kosovë (@EuropeanUnionInKosovo). Ngjarja do të zhvillohet përmes një platforme virtuale të takimeve.
Kontrata do të përfshijë furnizimin me pajisje të specializuara laboratorike dhe mjete për mbrojtjen nga COVID-19 dhe trajtimin e tij, për nevojat e Qendrës Klinike Universitare në Prishtinë. Pajisjet përfshijnë respiratorë/ventilatorë, pompa infuzioni dhe pompa infuzioni shiringë, auto-ambulanca, oksimetër pulsi në gisht dhe oksimetër pulsi, monitorues të pacientëve, defibrilatorë, elektrokardiografë.
Në rast se disa nga artikujt e mësipërme nuk mund të sigurohen, do të prokurohen furnizimet e artikujve të tjerë të nevojshëm, siç janë testet, gypat, maskat, dorezat dhe dezinfektuesit. Artikujt do të blihen përmes Zyrës së Kombeve të Bashkuara për Shërbimet e Projekteve (UNOPS), e cila do të jetë nënshkruesi tjetër i kontratës. Eventi do të zhvillohet në prani të Kryeministrit në detyrë, Albin Kurti dhe Ministrit në detyrë të Shëndetësisë, Arben Vitia.
Ftohen mediat ftuar të ndjekë transmetimin e drejtpërdrejtë në faqen e BE-së në Facebook”, ka njoftuar Ministria. /Spektri

Kryeministri në detyrë, Albin Kurti, përmes një video-mesazhi iu është drejtuar qytetarëve duke iu kërkuar respektimin e masave për parandalimin e shpërndarjes së koronavirusit.

Ai ka thënë se qytetarët nuk kanë nevojë të brengosen sepse nuk do t’iu mungojë asgjë të cilën e ka pasur më parë.

“Kosovës nuk do t’i mungojë kurrë, as mielli, as ushqimet tjera dhe asgjë të cilën e kemi pasur më parë. Tregtia po vazhdon njësoj si më parë dhe nga doganat kemi informacion se mallrat që po hynë në Kosovë sa vijnë e shtohen. Mos blini më shumë se sa ju duhen, sepse do t’iu skadojnë pa u konsumuar. Qëllimi ynë është që ta ndalim përhapjen e virusit. Izolimi është masa e vetme që bota e ka për virusin në mungesë të vaksinës”, ka thënë ai, raporton KOHA.

Kurti tutje ka shtuar se duhet kujdes i veçantë këto ditë, ku sipas tij, pritet që të ketë shtim të numrit të të prekurve.

Ai tutje ka shtuar se kjo është situata më serioze që vendi ka pasur që nga lufta.

“Këtë ditë do të hyjmë në muajin që sipas ecurisë që ka pasur ky virus do të mund të kemi shtim të të prekurve nga virusi, e pas këtij muaji do të mund të dalim nga kjo gjendje. Kjo pandemi po na mëson sërish ndjenjën e të qenit bashkë. Ne i kemi marrë masat kufizuese shumë më parë se sa vendet që sot po pësojnë nga ky virus. Që nga dita e parë kemi kërkuar që këtë situatë ta marrim me qetësi e pa panik. Kjo nuk do të thotë se situata nuk është serioze, në fakt kjo është situata më serioze që kemi pasur që nga pas lufta”, ka thënë ai.

Kurti thotë se “si popull ne jemi testuar shumë herë se sa të fortë jemi përpara armiqve të dukshëm e të padukshëm. Të gjithë së bashku duhet të përgatitemi për atë që na pret ditëve e javëve në vijim”.

Ai ka thënë se përveç shëndetit të njerëzve, koronavirusi ka prekur edhe ekonominë, prandaj sipas tij, duhet të përgatiten të gjithë për atë që do të vjen.

“Gjendja është tërësisht nën kontroll. Sot na shtohet edhe besimi që kemi te zhvillimi i mjekësisë dhe të punonjësit e shëndetit publik. Mirëpo kjo nuk duhet të na çlirojë, duhet ta bindim vetën dhe secilin familjar të rrimë në shtëpi. E di se sa e vështirë është të jesh mbyllur, ky është një lloj burgu që rëndohet në stinën e pranverës, teksa rruga e lagjes apo qielli i kaltër ngjajnë si fotografi në dritare. Mirëpo nuk është vuajtje e madhe të kufizohet dalja për një muaj, merreni me humor, sot keni internet i cili iu lidh aq shumë pa lëvizur fare. Nëse dilni ju i rrezikoni familjarët e sidomos të moshuarit”, ka thënë Kurti.

Ai tutje ka përmendur edhe masat të cilat janë marrë në pakon emergjente.

Kurti ka shtuar se roli i solidaritetit mes shteteve dhe organizatave ndërkombëtare po shtohet gjithnjë e më shumë. Ai ka përmendur ndihmën monetare nga BE-ja dhe SHBA-ja.

“Na ka marrë malli për kafe e makiato me shoqëri, por nuk duhet ta paguajmë atë në spital sepse është çmim i shtrenjtë”, ka thënë ai. /TV1

Kryeministri i Kosovës, Ramush Haradinaj ka thënë se nga prilli nuk ka më instrumente të tjera ligjore të funksionimit të shtetit në kuptimin financiar. Sipas tij, pa miratim të buxhetit të vitit 2020, shteti bankroton, meqë shfrytëzimi i buxhetit të vitit paraprak mund të bëhet vetëm deri në muajin mars.

Pas mbledhjes së Qeverisë, Haradinaj tha se në janar dhe shkurt nuk ka pengesa të funksionimit buxhetor.  Por, sipas tij, nëse vazhdohet njëjtë në gjysmën e dytë të muajit shkurt, atëherë fillon rreziku për dështim të funksionimit të shtetit.

“Për më 1 prill nuk ka instrumente të tjera ligjore të funksionimit të shtetit në kuptimin financiar, jo vetëm që bankrotojmë por dështojmë krejtësisht. Deri më 1 prill, është fundi”, tha Haradinaj.

E sipas Haradinajt, në prill pason bllokadë nëse nuk votohet buxheti i vitit 2020.Ai tha se Lëvizja Vetëvendosje, si fituese e zgjedhjeve të 6 tetorit, ka përgjegjësi që t’i jap Kosovës institucionet e reja, ose të ndërmarrë hapa të tjerë se çka do të veprojë tutje.

Ndërkohë, i pyetur se a ka marrë ndonjë ftesë për takim me Vetëvendosjen ose Lidhjen Demokratike të Kosovës, Haradinaj tha se partia e tij nuk është e përfshirë në asnjë lloj negociatash rreth krijimit të Qeverisë së re të Kosovës.

Kosova ka mbajtur zgjedhjet e jashtëzakonshme parlamentare tre muaj më parë, ku partia fituese ka dalë Lëvizja Vetëvendosje, e pasur nga Lidhja Demokratike e Kosovë, subjekte këto që ende nuk kanë arritur një marrëveshje për bashkëqeverisje.

(Kosova Sot Online)

Kryetari i Kuvendit të Republikës së Kosovës, Glauk Konjufca, priti sot në takim ambasadorin e Sllovenisë në vendin tonë, Bojan Bertoncelj, me të cilin diskutoi për raportet e mira që të dy vendet kanë ndërtuar ndër vite.

Siç thuhet në njoftim, ambasadori Bertoncelj i përcolli kryeparlamentarit Konjufca urimet e homologut të tij slloven, Dejan Židan, me rastin e zgjedhjes në krye të Kuvendit të Kosovës.

Kryeparlamentari Konjufca vlerësoi lart mbështetjen e Sllovenisë për Kosovën në të gjitha proceset, ndërsa përkrahjen për Kuvendin e saj e konsideroi të një rëndësie të veçantë.

Ai tha se nëpërmjet kësaj mbështetjeje, Kuvendi ka arritur të avancojë kapacitetet në shumë aspekte të punës së tij, ndërsa theksoi nevojën që bashkëpunimi midis dy parlamenteve të forcohet edhe më tej në të ardhmen. /tribuna

Njëjtë sikurse në vitin e kaluar, shefi i diplomacisë serbe, Ivica Daçiq, ka thënë se do ta vazhdojë luftën kundër pavarësisë së Republikës së Kosovës.

Daçiq ka thënë se në vitin 2020 Serbia do të vazhdojë përpjekjet për ruajtjen e integritetit territorial dhe pavarësisë së Serbisë dhe për gjetjen e një zgjidhje kompromisi sa i përket çështjes së Kosovës.

“Unë pres më shumë shtete që të tërheqin njohjes. Do të vazhdojmë veprimet diplomatike kundër anëtarësimit të Kosovës në organizata dhe institucione ndërkombëtare”, ka thënë Daçiq.

Përveç tjerash Daçiq ka thënë se do të vazhdojnë të forcojnë raportet jo vetëm me Rusinë dhe Kinën, por edhe me SHBA’në, Francën, Gjermaninë, Britaninë e Madhe, siç ka potencuar diplomati serb për të ruajtur raportet “me miqtë tradicional nëpër botë”./GazetaExpress/

Kryetari i Partisë Demokratike të Kosovës, Kadri Veseli,  është kthyer sot nga Haga, pasi që dje u intervistua në Gjykatën Speciale, shkruan Indeksonline.

Atë e pritën veterantë e simpatizantë të Partisë Demokratike të Kosovës me lule në dorë.

Madje, shumë nga ta kishin veshur edhe disa bluza ku shkruhet: Unë jam Kadri Veseli, Luftëtar Krenar!

Veseli së bashku me bashkëshorten e tij , me të arritur në Kosovë ka thënë se dëshiron sa më shumë paqe dhe qetësi për popullin e Kosovës.

“Sa më shumë paqe, qetësi për popullin tonë. Zoti e mbrojtë Kosovën. Lavdi e përjetshme për Ushtrinë Çlirimtare të Kosovës. Gjithmonë krenar për jetë. Faliminderit të gjithëve”, ka thënë Veseli./Indeksonline/

Ambasadori Rus në Serbi Alexander Botsan-Kharchenko e ka quajtur Kosovën ‘një shtet të rremë’ dhe ka thënë se kjo është ende pjesë e Serbisë, duke shtuar tutje se BE’ja duhet të presë për t’i pajtuar këto të dyja.

Deklaratat e radhës të politikanit nga Rusia e mbështesin edhe më shumë pozitën e Qeverisë së Serbisë, e cila po refuzon ta njoh Kosovën që nga shpallja e pavarësisë, më 17 shkurt 2008.

Në lidhje me ndërmjetësimin e BE’së për të arritur një marrëveshje Prishtinë-Beograd, në mënyrë që dy vendeve t’u hapën rrugët rreth proceseve të rëndësishme, Botsaj Kharchenko është deklaruar se është më mirë të presin.

“Nuk ka asnjë ide në vend të parë për një ndërtim sa më të rregullt të dialogut. Është më mirë të presin, të ndërtohet besimi, dhe të rregullohen problemet e vogla por të rëndësishme”, ka thënë ai para gazetarëve serbë.

Në fund, Ambasadori nuk ka ngurruar të quajë Kosovën një ‘shtet të rremë dhe pjesë të Serbisë’, duke shtuar se nëse ka ndonjë marrëveshje, ajo duhet të bëhet me kompromis, përcjell Gazeta Metro.

“Kosova është pjesë e Serbisë. SHBA’të kanë ndërtuar një shtet të rremë, kur e mbështetën Kosovën për ta deklaruar shpalljen e pavarësisë së saj”, ka thënë ai.

Kujtojmë se pavarësisht këtyre deklaratave të vazhdueshme që vijnë nga Serbia e Rusia, Bashkimi Europian dhe SHBA’të i kanë bërë thirrje Kosovës që ta heqë taksën 100 përqind dhe të kthehen në tavolinën e bisedimeve me Beogradin.

Në këtë mënyrë, sipas tyre, vendi do të arrijë një marrëveshje finale dhe do t’u hapen shumë rrugë dhe procese në integrimet euro-atlantike./gazetametro.net

Kosova është vetëm mbi Republikën Dominikane dhe Filipinet në PISA 2018.

Rezultatet që janë duke u publikuar e nxjerrin Kosovën me një rezultat të ngjashëm me atë të vitit të kaluar dhe në disa fusha ka edhe regres, njofton Klan Kosova.

Kosova ka 353 pikë në performancën e leximit, 366 në matematikë dhe 365 në shkenca.

Për të publikuar rezultatet zyrtare ministri në detyrë i Arsimit, Shyqiri Bytyqi, do të mbajë konferencë në ora 11:00.

Ndërkaq, në krye të kësaj liste prin Kina, ndërsa Singaporin e lë në vendin e dytë. /Klan kosova

Kosova sot do të jetë në ditë zie, pas tërmetit të fuqishëm që goditi Shqipërinë e Mesme, ku la dhjetëra persona të vdekur dhe qindra të lënduar.

Presidenti, Hashim Thaçi, ka marrë dje vendim që dita e mërkurë, të jetë ditë zie në Kosovë, shkruan Kosovarja.

Kështu që, sot flamujt do të ngrihen në gjysëmshtizë, në nderim të viktimave nga tërmeti.

Në anën tjetër, shumë shqiptarë nga Kosova, tashmë kanë marrë rrugën për në Shqipëri, duke u dalë në ndihmë vëllezërve shqiptarë.

Qeveria në detyrë e Kosovës, dje mori vendim që 500 mijë euro të ndahen nga buxheti i shtetit si ndihmesë për shtetin shqiptar, transmeton Spektri.