Seanca plenare e së hënës në Kuvendin e Shqipërisë ka nisur sërish me tensione, opozita ka përmbysur karriget dhe ka hedhur tymuese duke sjellë kaos.
Deputetët e opozitës janë përplasur me Gardën që në hyrje të Kuvendit të Shqipërisë, ndërsa tensionet janë rritur me nisjen e seancës plenare.
Seanca plenare e së hënës është mbyllur, me opozitën që shpërtheu me karrige të përmbysura dhe tymuese.
Deputeti i opozitës Flamur Noka shkaktoi tensione duke ndezur një tymuese, duke çuar në një reagim të menjëhershëm nga kryetarja e Kuvendit, Lindita Nikolla.
Pas veprimit të tij, Noka u njoftua se ishte i përjashtuar nga seanca për shkelje të rëndë të rregullores së Kuvendit.
Konfliktet nuk munguan, dhe deputetët Albana Vokshi dhe Flamur Noka u përfshinë në një përleshje me punonjësit e Gardës edhe para foltores.
Ndërkohë që deputetët e mazhorancës vazhdonin fjalimet e tyre, deputetët opozitarë Gazment Bardhi dhe Edi Paloka tentuan të mbyllnin mikrofonin e deputetit të PS-së, Petro Koçi, duke e quajtur atë komunist.
Në një deklaratë për median, ish-kryeministri Sali Berisha akuzoi kryeministrin aktual, Edi Ramën, duke thënë se ka abuzuar me buxhetin e shtetit për përfitimet e tij personale.