“Largimi i burrave drejt Perëndimit po i nxitë kompanitë të punësojnë gra”

Ish-drejtori i Doganës së Kosovës, Naim Huruglica, vlerëson se vajzat dhe gratë në Kosovë nuk kanë qenë të barabarta në punësim. Por, sipas tij, largimi i burave në vendet perëndimore, ka bërë që shumë kompani t’i plotësojnë vendet me të punësuara gra.

“Ne si shoqëri, e dimë që gruaja, femrat nuk kanë qenë një kohë të gjatë të barabarta, ose së paku nëse e bëjmë një krahasim me vendet perëndimore, femra në Kosovë nuk ka qenë gjithmonë e barabartë…por unë besoj që kjo është duke u përmirësuar, edhe mund të jetë edhe për një arsye që nuk është ndoshta më e mira, në kuptimin mirë që po përmirësohet, por e kam fjalën se largimi i madh i të rinjëve, sidomos i gjinisë mashkullore, në drejtim të vendeve perëndimore, ka nxit që shumë prej kompanive tani kanë filluar që t’i plotësojnë vendet e tyre me të punësuara femra”, deklaroi ai në Tëvë 1.

Ai theksoi se numër i madh i dyqaneve që shesin pajisje ndërtimore, ndryshe nga e kaluara, tani kanë të punësuara 80% punëtore gra.

“Pa dashtë me përmend emra specifik, numër të madh të dyqaneve ose qendrave të cilat shesin pajisje qoftë ndërtimore ose tjera, po ku në të kaluarën ka qenë shumë e vështirë ta gjesh një femër që punon në atë sektor, sot ndoshta 80% e punëtorëve janë femra. Ka filluar të ndryshojë, por unë besoj se kjo nuk është rezultat i emancipimit tonë, është më shumë rezuItat i nevojës për të plotësuar vendet nga mungesa e fuqisë punëtore”, shtoi Huruglica.