Gaza veriore nuk ka më një spital funksional, tha Organizata Botërore e Shëndetësisë të enjten, duke përshkruar skena “të padurueshme” të vëzhguara nga ekipet gjatë një misioni të fundit.
“Në të vërtetë nuk ka mbetur asnjë spital funksional në veri”, tha në një konferencë shtypi Richard Peeperkorn, përfaqësues i OBSh-së, shkruan CNN, transmeton Klan Kosova.
Sipas Peeperkorn, spitali i fundit funksional në Gazën veriore ishte Spitali Al-Ahli, por karburanti, energjia, furnizimi mjekësor dhe mungesa e personelit e kanë bërë atë “minimalisht funksional”.
“Tani Al-Ahli pushoi së funksionuari plotësisht dhe po funksionon vetëm si bujtinë aktualisht pa ose shumë pak kujdes.”
Vetëm nëntë nga 36 spitalet në Gaza janë duke funksionuar tani, tha Peeperkorn, duke shtuar se të nëntë ndodhen në Gazën jugore.